नेपाल सरकारले रसुवा केन्द्रित बाढी–पहिरोबाट प्रभावित क्षेत्रमा खोज, उद्धार, राहत तथा पुनःस्थापनाको कार्यलाई तीव्र गतिमा अघि बढाएको जनाएको छ। गृह मन्त्रालयअन्तर्गत राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको अद्यावधिक विवरणअनुसार २०८३ भदौ १६ गते दिउँसो १:०० बजेसम्म विपद्का कारण मानवीय तथा भौतिक क्षति उल्लेखनीय रहेको छ।
प्राधिकरणका अनुसार हालसम्म देशभर १,००३ जनाको मृत्यु पुष्टि भएको छ। शव फेला परेका जिल्लामध्ये रसुवामा ५४, नुवाकोटमा १५, धादिङमा ५७, गोरखामा ६५, तनहुँमा ३८, नवलपरासी (पूर्व) मा २१६, नवलपरासी (पश्चिम) मा १७० तथा चितवनमा ३२१ जनाको शव फेला परेको छ।
यसैगरी, करिब ३,१९६ जना अझै सम्पर्कविहीन रहेका छन्। सम्पर्कविहीनमध्ये नेपाल प्रहरीका २५, नेपाली सेनाका ५४, सशस्त्र प्रहरी बलका १३, भन्सार कार्यालयका १५, अध्यागमन कार्यालयका ३, रसुवाका करिब ६४५, नुवाकोटका करिब १,५५८, जलविद्युत् आयोजनासँग सम्बन्धित करिब ६३२, विदेशी नागरिक २५३, विदेशी पर्यटकसँग गएका नेपाली १६४, लाङटाङ राष्ट्रिय निकुञ्जका ३ तथा क्वारेन्टाइन कार्यालयका ३ जना रहेका छन्।
घाइतेको संख्या २७१ पुगेको छ। विभिन्न अस्पतालबाट १६८ जना उपचारपछि डिस्चार्ज भइसकेका छन् भने बाँकी घाइतेहरूको उपचार जारी रहेको जनाइएको छ।
खोज तथा उद्धार कार्यमा २१,३२४ जना सुरक्षाकर्मी परिचालन गरिएका छन्। यसमा नेपाल प्रहरीका ७,९१२, नेपाली सेनाका ९,२११ तथा सशस्त्र प्रहरी बल नेपालका ४,२०१ जना सहभागी छन्। प्रभावित क्षेत्रमा हेलिकप्टर, स्थलमार्ग तथा आवश्यक उपकरण प्रयोग गरी निरन्तर उद्धार अभियान सञ्चालन भइरहेको छ।
हालसम्म ११,८८४ जनाको सफल उद्धार गरिएको छ। नेपाली सेनाको हवाई उद्धारमार्फत विदेशी २७३ र नेपाली ३,५०९ जनाको उद्धार गरिएको छ। यसका साथै सेनाले हालसम्म ५२९ वटा हवाई उडान सम्पन्न गरेको छ भने निजी क्षेत्रबाट काठमाडौंसम्म २१ वटा उडान सञ्चालन भएका छन्।
राहत वितरणलाई पनि सरकारले तीव्रता दिएको छ। हालसम्म ३७ ट्रक र ३७ बोलरो मार्फत प्रभावित क्षेत्रमा खाद्यान्न तथा गैरखाद्य सामग्री पठाइएको छ। साथै हेलिकप्टरमार्फत ९ वटा उडान गरी आवश्यक राहत सामग्री पुर्याइएको छ। सशस्त्र प्रहरी बलले पनि राहत सामग्री वितरणका लागि ६७ वटा हवाई उडान सम्पन्न गरेको छ।
सरकारले प्रभावित जिल्लाका लागि नगद राहतसमेत उपलब्ध गराएको छ। प्राप्त विवरणअनुसार रसुवालाई १ करोड रुपैयाँ, नुवाकोटलाई १ करोड रुपैयाँ, धादिङलाई ५० लाख रुपैयाँ तथा प्रभावित १५ स्थानीय तहलाई ६ करोड ५७ लाख रुपैयाँ उपलब्ध गराइएको छ।
प्रभावित क्षेत्रमा आवश्यक इन्धनको मौज्दात पर्याप्त रहेको जनाइएको छ। हाल डिजेल ५२ हजार लिटर, पेट्रोल १८ हजार लिटर तथा हवाई इन्धन ६ हजार लिटर मौज्दात रहेको प्राधिकरणले जनाएको छ।
सञ्चार सेवा पुनःस्थापनातर्फ पनि उल्लेखनीय प्रगति भएको छ। नेपाल टेलिकमका ११० टावरमध्ये क्षतिग्रस्त अधिकांश सेवा पुनः सञ्चालनमा आएका छन् भने एनसेलका ७८ टावरमध्ये ७५ वटा पुनः सञ्चालनमा आएको जानकारी दिइएको छ।
सरकारले विपद् प्रभावित क्षेत्रमा खोज, उद्धार, राहत र पुनःस्थापनाका सबै निकायलाई समन्वयात्मक रूपमा परिचालन गर्दै नागरिकको सुरक्षा र आधारभूत सेवा पुनःस्थापनालाई उच्च प्राथमिकतामा राखेको जनाएको छ। साथै हराइरहेका व्यक्तिको खोजी, राहत वितरण तथा पुनर्निर्माणका कार्यलाई अझ प्रभावकारी बनाइने प्रतिबद्धता व्यक्त गरिएको छ।
प्रतिक्रिया
सम्बन्धित खबर
